चाङ्चुन नजिकैको एक सानो गाउँबाट हराएका सातवटा कुकुरहरूको अद्भुत यात्रा अहिले विश्वभर चर्चाको विषय बनेको छ। चीन मा घटेको यो घटना साहस, एकता र वफादारीको असाधारण उदाहरणका रूपमा हेरिएको छ।

मार्च १६, २०२६ को रात ती सातवटा कुकुरहरू अचानक हराएका थिए। स्थानीय स्रोतका अनुसार उनीहरूलाई कुकुरको मासु व्यापारसँग सम्बन्धित चोरहरूले समातेर ट्रकमा हालेर लगिरहेका थिए। ट्रक अँध्यारो रातमा अगाडि बढिरहेको थियो, तर बाटोमै ती कुकुरहरूले जोखिम मोलेर ट्रकबाट हाम फाले।

ट्रकबाट खसेपछि उनीहरू व्यस्त राजमार्गको किनारमा पुगे—घरबाट करिब १७ किलोमिटर टाढा। चिसो मौसम, शून्य डिग्रीभन्दा कम तापक्रम र अपरिचित बाटोका बाबजुद उनीहरूले हार मानेनन्। भिडियोमा देखिएअनुसार सबै कुकुरहरू सँगै हिँडिरहेका थिए—कोही अघि बढ्दा सबै अघि, कोही रोकिन्दा सबै रोकिने।

समूहमा रहेको जर्मन शेफर्ड कुकुरको खुट्टामा चोट लागेको थियो र ऊ लडखडाउँदै हिँडिरहेको थियो। तर बाँकी कुकुरहरूले उसलाई एक्लै छोडेनन्। उनीहरूले घेराबन्दी गर्दै उसलाई जोगाए, पर्खिए र सँगै अघि बढे। एउटा सानो कोरगी जातको कुकुरले अगाडि नेतृत्व गरिरहेको थियो, जसलाई चिनियाँ सञ्चारमाध्यमले ‘डापाङ’ (बिग फ्याटी) नाम दिएका छन्।

मार्च १७ को रात एक चालकले यो दृश्य देखे—सातवटा कुकुरहरू राजमार्गमा लाइनबद्ध हिँडिरहेका। उनले भिडियो खिचेर सामाजिक सञ्जालमा पोस्ट गरे, जुन केही समयमै भाइरल बन्यो। उक्त भिडियोले २३० मिलियनभन्दा बढी भ्यूज पाएको बताइएको छ।

उक्त भिडियो देखेपछि स्थानीय स्ट्रे कुकुर उद्धार केन्द्रकी स्वयंसेवक टोङ टोङ निकै चिन्तित भइन्। उनले कुकुरहरूको खोजीमा गाउँ–गाउँ पुगेर सूचना टाँसिन् र ड्रोन प्रयोग गरेर खोजीसमेत गरिन्। चिसो मौसममा खाना र पानी नपाएको हुनसक्ने चिन्ताले उनलाई थप सक्रिय बनाएको थियो।

अन्ततः मार्च १९ मा ती कुकुरहरू घर फर्किएको खबर आयो। तीमध्ये तीनवटा कुकुर चाङ्चुन नजिकै बस्ने एक महिलाका रहेछन्। चार दिनसम्म खोज्दा पनि नपाएपछि उनले आशा त्यागिसकेकी थिइन्। तर जब ‘डापाङ’ घर फर्कियो, उनी निकै भावुक भइन्। पछि अन्य कुकुरहरू पनि नजिकका गाउँमा सुरक्षित अवस्थामा फेला परे।

कुकुरहरू किन हराए भन्नेबारे विभिन्न अनुमान गरिएका छन्। केहीले उनीहरूलाई मासु व्यापारका लागि चोरिएको हुनसक्ने बताएका छन् भने अरूले पाल्तु जनावरको रूपमा बेच्न वा आफैं हराएको हुनसक्ने बताएका छन्।

यो घटनाले सामाजिक सञ्जालमा ठूलो भावनात्मक प्रतिक्रिया ल्याएको छ। धेरैले कुकुरहरूको वफादारी, एकता र साहसको प्रशंसा गरेका छन्। चिसो मौसम, थकान र जोखिमपूर्ण अवस्थाका बाबजुद पनि एकअर्कालाई नछोड्ने उनीहरूको व्यवहारले ‘नो डग लेफ्ट बिहाइन्ड’ भन्ने सन्देशलाई जीवन्त बनाएको छ।