नेपालभाषा व नेवाः समाज थकायगु ज्या धालकि तसकं हे नुगः क्वसायका थःगु पलाः तःपलाः यानादीम्ह भाषासेवी एवं समाजसेवी लक्ष्मीदास मानन्धरयात लुमंकेगु ज्या भाषासेवीपिं व समाजसेवीपिं जानाः ने.सं ११४५ कछलाथ्व सप्तमि २०८१ साल कार्तिक २३ गते शुक्रवाःया न्हि थँहितिइ याःगु दु । थँहितिया शान्ति शिक्षा मन्दिर माविया प्रांगनयप् न्ह्याकूगु थुगु ज्याझ्वलय् नेवाः न्ह्योलुवाः मल्ल के सुन्दर, नेवाः देय् दवूया नायो पवित्र बज्रावचार्य, नेपाल सम्वत न्हूदँ राष्टिय समारोह समिति ११४५ या नायो राजेन्द्र प्रसाद श्रेष्ठजुपिन्सं मदुम्ह भाजु मानन्धरया व्यत्तित्वयात कःघाना थःथःगु खँ तयादीगु खः ।

लक्ष्मीदास मानन्धर स्मृति प्रतिस्ठानया ग्वसालय् लक्ष्मी दासया काय्भाजु एवं प्रतिस्ठानया नायो नारायण दास मानन्धरया सभा नायोसुइ न्ह्याःगु थुगु ज्याझ्वलय् प्रा।डा। त्रिरत्न मानन्धरं शान्ति शिक्षा मन्दिर माविया स्थापना कालंंनिसेंया खँयात परिचयात्मक रुपं जानकारी बियादीगु खः । वयकलं थःगु खँया झ्वलय् थँहितिया थुगु स्कुलयात क्वातुका यांकेत भाजु लक्ष्मीदास मानन्धरं म्हितादीगु भूमिका व यानादीगु योगदानया विषयया खँ नं कनादीगु खः । स्कुल स्थापना यायत व न्ह्याकेत गुलि संघर्ष याय्माः धैगु खँ थुगु स्कुृलया म्हिगःया संघर्षया खँयात प्वला स्वयावन धाःसा सीकेफइगु खँया न बोध जुइकथं खँ तयादीगु खः ।

मदुम्ह समाजसेवी लक्ष्मीदास मानन्धरया झ्वाताय् उपस्थित सकसिनं भावभक्तिपुर्वक स्वां देछाया श्रद्धान्जली नं प्वंकेगु ज्या नं जूगु थुगु ज्याझ्वः सुजिव बज्राचार्यजुं न्ह्याकादीगु खःसा ज्याझ्वलय् उगु ब्वनेकुथिया ब्वमिपाखें लक्ष्मीदासाया विषययात कःघाना च्वयातःगु चिनाखँ छपु नं वाचन याःगु खः ।

मदुम्ह धर्मसेवी एवं राजनीतिज्ञ लक्ष्मीदास मानन्धरया ९६ दँबुदिँया झ्वलय् थुकथं न्हापांगु ज्याझ्वःया रुपय् थुगु ज्या याःगु खः । लक्ष्मीदास मानन्धर निदँ न्ह्यः ९४ दँया वैशय् मदुगु खः ।

समाज व भाषायात कयाः च्यूताः तयाः थःगु जीवनकालय् उत्थानया ज्या याना वपिन्त न्ह्यावलें लुमंका च्वनेमाः धैगु भावना ज्वना थुकथंया ज्याझ्वः याःगु खःसा मदुम्ह मानन्धरयात लुमंका छगू मिनेट मौन धारण नं याःगु खः ।

बाँपीझ्याला डटकम, द्वाल्खा
नेपाल सम्वत् ११४५, कछलाथ्वः ७ (२०८१ साल कार्तिक २३ गते शुक्रवाः) ८ नोभेम्वर, २०२४ ।