बालकृष्ण श्रेष्ठ “पासा”
स्थानीय चुनाव जुइ स्वयेन् घत्केंं भाषण ङेकेर्हिन् । आम भाषण ङेइत छेँय् ज्येतु त्वार्त लिङार्हिन, सा चिला त बनपाखाकु त्वार्त लिङार्हिन् । गुनुङ् इरिपिरि चिपु सिलि त्वार्तं ओन्हिन्, गुनेङ् कयमिच स्कूल कलेज तु उइँ त्वार्त झोलाय् गुखितु चर्बुत्के भ्वात्हिन्, हात्त हर्स नेकपा एमाले हँग उ देशय् दोखुनु स्वयेन् ड्वाकु राजनीतिक दल, दोखुसे मुथुकु नेपाल देश हँगतु एमाले खेउँरा बार्पयेन् च्वँगुतन्, खास खँ हरिमल्नसिन् एमाले बामलकु पार्टीउरि मखे ।

तर उ राजनीतिक पार्टीय् मूल मि मूल नेतापेन् थउत थउतु येक्कु बुद्धिमानी सिउताउ, जिथिनागु खँ सउ गुनुङ् मद हङ ड्याङन् ड्यारी मफये दम्भ बुयेन् येउपिसिन् उ देशय् दोखुनु मिपेन् थिगुरतु नागरिक खेउँ हँगन् मनकु मतयेन् नागरिकपिस्त थिम्हा थिम्हा ल्येयेन् थउ पार्टी दुपानय् खेउँरा मखेरा हँगन् येउता ज्येखँकु पाकेइरि व्यहोरा क्येँग लागिन् तु घत्के थेँ मिपेन् उ पार्टी त्वार्त लिचिलेन् ओंगु खोइँ दमु ।

राजनीतिक पार्टी खास वा येउ देश मुलुककुङ् आनागु तु खेउँ, दोखुनु स्वयेन् थाबि तहकु च्वंगु ड्वाकु नेतापिसिन् मखेउ खँ न्वन्हार्न क्वबि च्वंगु पिसन् सिजग येरिमल्गु खेउँ, तर झन् क्वबि च्वंगुपिसिन् छोउ मिकु घेर लुयेथेँ मदउ मखेउ खँपेन् ङेङ्के झन् राक पित यके खँ तयेन् बियेन्लि ड्वाकु नेतापेन् काँकर तिवा मुथेँ मुइरि स्वभाविकतु खेउँ । आन्थिनुं नेपाल देशय् नेकपा एमालेय् ड्वाकु नेतान्नसि ज्येमि (कार्यकता) टुल्केतु घमण्डय् पाखा गयेन् खँ ल्हाइरि बाँलकु खोइँमद ।

ओंगु न्हिय् संसद अधिवेशनकु हाबिय् प्रधानमन्त्री आले नेकपा एमालेय् मूलमि भाजु खड्ग प्रसाद ओलीन् सोँ घडी टाहागौ खँ न्वन्हार्न गु खँ ताइदत आमु खँ ङेन्नसिन् भाजु ओली त नेपाल देश दुपानय् यथार्थ खँ स्वयेन् सत्ताकु च्वंगु नेतापिस्त बोल बियेन् न्होलु ब्वकेय् थेँ ब्वके क्वत्यालि लागिन् जुकुन् अध्यक्ष जुये थिनागु खोइँदत । देशय् लागिन् हातिङ् उपलब्धि मदउ खँ तयेन् प्रधानमन्त्री शेर बहादुर देउवा त व नेपाली काँग्रेस त भतुवाय् ल्याखान् दउ मदउ खँ हँग ताइदत ।

आन्थितु नेकपा माओवादीय् ड्वाकु मूलमि पुष्पकमल दाहाल प्रचण्ड त नइ बियउरा हँगन् लिखन् लिङाउ चिला खिचाथेँतु बार्पयेन् गुलिं खँ हत्चु आमु खँ दुपान देशय् हित व भलाइय् लागिन् थिगुर खग्वाराटुल्के पित माकार्जु । खाली थउ दुपान च्वंगु केन्द्रीय दुज, सभासद व ज्येमिपे लागिन् जुकुन् थउ अध्यक्ष जुय् आले मेबु मि नागरिकपेन् हातिङ् मखे हँग थिनागु चिचा नुगरन खँल्हायेकु आम जनमानसय् लागिन् दुःखय् खँ खेउँ । यिनागु खालय् खँ भाषण हङ तिवा मुर्सं प्याटा माखाउ काँकर थिनागु जुकुन् खेउँ ।