बाँपीझ्याला, येँ । थन्हु जेठ ३ तिथी नेपाल देशय् कम्युनिस्टय् इतिहासकु दोखुनुं स्वयेन् बाँमलकु मभिंगु न्हि । सायद आमु मिपिस्त थन्हुय् न्हि लुओन्केर्न गुन्तं म्वग्र झ्यातयेन् येइफरै, गुनुं तिर्तिरपाइफरै हर्स गुन्तरी उ न्हिय् नाम तु माकार्सं जिउजु हँगन् लिचिलीफरै ।

हात्तहर्स थउत मल्गु ओप्तेचा हो ओल्तेचा स्वार्थय् लागिन् आनागु बुद्धि, विवेक, बल हो नैतिक दउ मित दुपान दुपानतु शकुनीय् जाल थायेन् यिनागु मित नारायणी खोकु थोँगन् थिगुर मभिंगु दुर्घटनाय् नाम बियेन् लिचिलेन् थन्हु ड्वाक्ड्वाकु पदकु च्वँगन् थउङ् ङिलेन् आसेपासेतं ङिल्के च्वँगन् च्वनहिन् । आमु बामलकु घ्यार्दउ न्हि थन्हु खेउँ ।

गु न्हिखुन्हु नेपाल देशय् बाँमलकु व्यवस्था त हिलेन् न्हुलु दोखुसेतं जिउ बहुदलीय जनवाद हाइत घत्कें ड्वाकु संघर्ष येँगन् २०३५ सालन नसि जाउ मदियेन् जनजागरण हाइत लिमचिलेन् देशय् तानाशाहपे घुर्कि व धम्की ख्वोङन् मघ्याङन् हाखेन लिङाउ मिय् नाम खेउँ कमरेड मदन भण्डारी ।

आले कमरेड भण्डारी नाप लिङायेन् संगठन त शक्तिशाली दकेइत टुटी जाउमदियेन् ल्हाहाकु ल्हाहा बाहाकु बाहा तयेन् ग्वाहार बियेन् च्वंगु थिम्हा मि खेउँ कमरेड जीवराज आश्रित । नेपाल देशकु जुकुन् मखे मदउ मदन भण्डारी व जीवराज आश्रितय् खँ लुओन्के हार्नसिन् दोखसे नुगर पिइयेन् मिखाकु ख्वबि थिखायेन् येर ।

आमु थिगुर बामलक दुर्घटना हँगन् आमनापय् मिपिसिन् ट्वाप्चि म्वाल्सं यथार्थकु आमु दुर्घटना म्वजुयेन् हाबिन्नसि दके तयेन्तय् सुनियोजित घटना तुखेउँ हँगन् अनुमान येकुपेन् येक्कु दमु ।

मदन भण्डारीन् ख्वङ उ देशय् ख्वाल हिल्केय् माँगस वा सतकु हिल तर विचार व भावनाउरि हिलि मफयेन् च्वन, जनताय् लागिन् बहुदलीय जनवाद हायेन्लि देशकु सामाजिक, आर्थिक हो कृषि क्रान्ति हिलिउरि ज्येय् लागिन् मदउ भण्डारीन् गु पाराक ल्येइ टेँग खेउँ आमु पाराकन जउखउकु च्वंगुपे टुटिकु न्हुयेउ हँगन् आमु बामलकु घटना येँग खेउँ हत्न हातिं मापायेउ जेउ ।

मदउ कमरेड भण्डारीय् कालात थन्केसिय् महामहिम राष्ट्रपति जुइ स्वयेन् हाखेन थउ कैमु त स्यारित योजना दकेउ मिपेन् पितकायेन् कानुनी सजायँ बिकेइ हँगन् निकै तिम्तिमुकुजु, तर आमु खँ त ट्वाप्चित थपक्क राष्ट्रपति दके बियेन् मुथु प्वाकल टियेन् बिर्जु ।

आमु खँकुं मिपिसिन् बाँमलकु टोइँरि अस्वभाविक मखे । थन्हु न्हिगुद दत मदन भण्डारीन् उ ब्व त त्वार्त ओङ, उ ब्याला टुल्के न ज्यानस्याकु मि पित कार्हिन्, न जनताय् लागिन् हातिं बाँलकु ज्ये हार्हिन्, खालि किपा थिगुर टेबिल देपान तयेन् माला कोखाकेइरि व खँ थिक्टो न्वन्हायेन् श्रद्धाञ्जलि बियेन् ख्वाल ट्वाप्चियेन् न्हास टिक्रेत्किेइरि ज्ये बाहेक मेबु हातिं खोइँमद ।

तर मदउ कमरेड मदन भण्डारी व मदउ कमरेड जीवराज आश्रित त छिजिन् गुल्पनुं लुंम्वन्केइ मजि, थन्हु गुलिं ज्ये खँ हिलेन् थउ स्वतन्त्रता त पिपान केइँ फयेन् च्वनगु आमकु उ निस्म्हा महान नेतापे ड्वाकु ल्हा दमु । उ महान मिपे आत्माकु येल्पनु शिचयेन् थ्वचोँ हँगन् इसिन् विचार प्वंकेरगु ।