बाँपीझ्याला, द्वाल्खा । नेपाल सम्वत् ११४२ चौलागा, नेपाल देशय् नेवारपेन् च्वंगु ड्वाकु देश शहरमध्येकु थिगुर शहर द्वाल्ःखा अभयपुर खेउँ । झण्डै बच्छिचच्छि नेवारपे बस्ती धुन्दु उ चौला (चैत–बैशाख) कु द्यउपे रथ सलेन् बुयेन् डुयेन् जात्रा ङाकेइरि चलन दमु ।

गिथि कि येँ देशय् हाँडीगाउँ, नक्सालकु गणेश, भगवतीय् रथ बुयेन् देश हिल्केइरि जात्रा, चाबहिलकु चन्द्र विनायक गणेश द्यउ जात्रा, जोरपाटीकु चामुण्डा देवी, गणेश हो भैरवय् रथ बुयेन् देश हिल्केइरि जात्रा, सक्व देशकु बज्रयोगिनी (खड्ग योगिनी) माँ त खटकु तयेन् देश हिल्केइरी जात्रा, टोखाकु चण्डेश्वरी बिस्केट रथ जात्रा, ख्वप देशय् बिस्केट जात्रा ङाकेइरिचलन दमु ।

आन्थितु बैशाख पुन्हिसननसि हाँडीगाउँ, तिसा पुखुर (गहना पोखरी), विशालनगर, चण्डोलकु भाटभटेनी देवी, टुँडाल देवीय् जात्रा येतहिन् । यल देश (ललितपुर) कु हेँगौ करुणामाई (बुग्द्यउ) जात्रा, येँ देशय् नारायणहिटी हाखेन दर्बारमार्ग जमल घण्टाघरलान् त्वायौ करुणामाई रथसले जात्रा थेँतु द्वाल्खा शहरकु हेँगौ करुणामाँ त गुटोँ टाहागौ रथकु करुणामाई त तयेन् थिमुठीब्यान् ड्वाकु गुखीन् सलेन् जात्रा ङाकेइरी चलन दमु ।

द्वाल्खा देशय् करुणामाई जात्राय् ल्याखाःकु स्वर्न थन्हु पुन्हिसखुन्हु बल्न्हि करुणमाई द्यउ त दुधुकु ठुङन् परेवा खुन्हु रथ दकेय् ठाईँ पिंगल ट्वालकु येइँरि चलन दमु । उ ताक्कु करुणा माई द्यउत बुइरि हतिइथि येरिउरि ज्येखँ बज्राचार्य पिसिन् येतै हर्स पूजाआजाय् विधिविधान ड्वाल्ङा ट्वालकु येङन् परेवा खुन्हु पिंगलकु येँगन् रथकु तये चलन दमु ।

आले द्वितियाखुन्हु ंिपंगललान् नक्छें, तृतियाखुन्हु नक्छेंलान् श्यामसुन्दर, चौठीखुन्हु श्यामसुन्दरलान् टसिचा, पंचमी खुन्हु टसिचालान् थाटों गके रास्नीलान् थाबिन स्येङकु थ्येंकेय् चलन दमु, आले षष्ठीखुन्हु थाब्न स्येङलान् कोत तेर्सो मुलोँ येँगन् दुङ्गल ट्वालय् स्येङ्कु थ्येंकेइरै । आले सप्तमीखुन्हु दुङ्गललान् लिपुल्के हायेन् पिंगल ट्वालकु थ्येंकेइरि चलन दमु ।

आँकु चच्छि बास तयेन् नवमीखुन्हु करुणामाँय् मूर्ति त बज्राचार्यन् मुडेकु बुयेन् हाबि पितकाये ठाइँ ड्वाल्ङाकु थ्येङ्केयेन्लि द्वाल्खाय् बुग्द्यउ जात्रा कोचल्गु जुर ।

द्वाल्खाय् बुग्द्यउ जात्राय् रसताइदउ खँ हङ उ जात्राताक्कु चाक्साला दके हाँसाकु तयेन् मिइउरि खेउँ । हाबि हाबि उ चाक्सला मित ट्वाल ट्वालय् ल्यास्म्हा दाजुकिँज पिसिन् गुनान् बाँलकु दकेइफरै हँगन् थउथउकु प्रतिस्पर्धा येकुतन् ।

आमुताक्कु चाक्सला मित गुर्कोटय् रामजी प्रधान, उदयचन्द्र श्रेष्ठ, पिंगलकु धर्मात्मा, दिपक, पालचुटीय् विष्णुभक्त मास्केपेन् येक्कु खटैजुतन् । येउता जुर्सं द्वाल्खाय् येउ जात्राकुं थिता थिता विशेषता दयेन् च्वन ।
बालकृष्ण श्रेष्ठ “पासा”