नेपाल सम्वत् ११४२ चिल्लाथ्व एकादशी सोमबार । हाबि बाजे बराजुय् पालान्नसि दाँसपत्तिं फागु म्येथयेन् च्वङ फागु नाघय् पालाकु घत्कें खँय् ल्याखाकु जाउदिउ खँ ताइदत । थि ल्याखान् सोर्न कोरोना माहामारी व्यथाय् कारण खोइँदत हर्स मेबु कारणउरि हाबिन्नसि बियेन् च्वङ दस्तुर वडा कुठीलान् मबिय् लागिन् आमु फागु जात्रा ङाकेइ मफ्mये खँङ् ताइदत । आले अझ मेबु कारण हाति हर्स महनी ताक्कु बहिरय् चक्र डोबरकु मेस स्याङन् भोस नकेर्न थिभाग भोस सेङ ट्वाल नक्छेंकु च्वंगु जोगी खलकय् थाकति मदइदोंगु कमल जोगीय् ड्वाकुरी कय् गोपाल जोगीत अनिवार्य बिमल्गु चलन दउकु नाघ आमु गोपाल जोगी मफयेन् थउ भाग कारउइँ मफर्न भाग तर मायार हँ, थउ मफर्सं छेँकु च्वंगु जाहानपिस्त बिर्सं ज्युजु ।

तर वास्तातु मयेङ लागिन् थउ त गुमान येङ थिनागु जुर उतु कारण्न फागुन पुनिसय् हातखुन्हु बल्नी मानेङन् च्वङ फागु ब्वइँरि ज्ये मयेङ खँ थन्केसिय् थाकति गोपाल जोगीन् इस्त ब्वय् खँ बिउ मिन् ताकेर्जु । हाबि हाबि द्वाल्खाय् पेम्हा थरिपिसिन् आमु फागु ब्वइँरि जात्रा ङाकेउ हँगन् ढ्याबा बियेन् च्वंगुदउ । लिबि प्रजातन्त्र ययेन्लि थरिपिसिन् बियेन् च्वङ दस्तुर गाउँपालिकालान् बिउजु आँकुलान् लित नगरपालिका जुर आले वडा कुठीलान् बिउजु आउ आमुङ बिइत थाकेयेन्लि थउके हातिं श्रोत मदयेन्लि जाउदिमल्गु जुर हँगन् गोपाल जोगीन् थउ नुगरय् खँ तये खँ सिदत । उ खँत थन्केसिय् वडा कुठीन् थुकेइ मल्दन । संस्कृति व परम्परा त म्वात्केइत द्वाल्खाकु नाइ जोगीपे ड्वाक्कु ल्हाहा दमु हँगन् दोखुसेनुं थुकेइमल ।

थिता खँरि द्वाल्खाकु च्वंगु नाइजोगी दाजुकिँजपिसिनुं थुकेइ मल्दन कि इसिङ द्वाल्खामि खेउँ हँगन् । इसिङ उ द्वाल्खाय् चाकु बुयेन् ड्वाकये खेउँ, द्वाल्खाय् नखतचखत म्वात्केइत इसिङ लिचिलिमजि हङ मन्कु तैमल्गु खेउँ । थिम्हानिस्म्हान् खँ स्येनै हत्नसिन्तु आपे लिखन लिखन् जुयेन् थउ टुटिकु थउ तु पान् प्वालिमज्यू हँगन् थुकेइमल्गु दमु ।

आउ जोगीपे फागुकु पोँट हात्त मुकेरै ?
फागुन् पुनिसय् हातखुन्हु चतुर्दशीय् बल्न्हि कोब्न सेङ ट्वाल नाप च्वंगु जोगी दाजुकिँजय् खलकपिसिन् कोतसाल नापय् रास्कुल (राजकुलेश्वर) हाखेनय् चिचासेङ लाङाकु सिँ ग्वार्मुङन् दात्तिकु ओँगौ पोँट स्वाङन् थउ रीतय् ल्याखान् पूजा येङन् मि छ्वके पोँट मुकेइरि चलन दमु । उ पोँट मुकेय् ल्याखाउरि हाति हर्स महाभारतकु दउ बाखनय् ल्याखान् सोर्न हिरण्यकश्यपु हङ साक्षसय् थउतु कय् प्रल्हाद मुचान्नसि विष्णुय् भक्त जुयेन् येउता ज्येखँकुं “नारायण नारायण” जुकुन् हङन् जुजु, आन्थि हत्न हिरण्यकश्यपु त बेस्न राक येउजु हात्त हर्स द्यउ हरि व आम राक्षस त पटक्क मनपरैम्वजुजु, थउ त थउतु सोँगुर लोकय ड्वाकु बलदउ वलवान बार्पच्वंगु जु । उ खँ प्रल्हाद त झन् मज्यूजु, निस्म्हा बोबुकय् येल्पनु हलेन् च्वइँमल्गुजु, आले उक्न आमु राक्षसय् केहेँ होलिका हङ राक्षसनीन् मीद्यउ (अग्नीदेव) य् तपस्या येत्न आमु मीद्यउन होलिका त गुल्पनुं मीन् मथियेउ, म्वपुरेउ हँगन् वरदान बियेन् तये खँ दाजु हिरण्यकश्यपुन् सियेन्लि गुल्ता सजायँ बियेनुं स्यारिमफय् कय् प्रल्हाद स्यारित केहेँ होलिका त हेकेहेके कय्उरि त मुड्याकु तयेन् सिँय् चाङ देपान तयेन् कोबिलान् मीन् तियेन् बिर्जु, होलिकाय् तपस्या सोयेनुं ड्वाकु घत्कें विष्णुय् भक्त जुयेलागिन् प्रल्हाद त हातिं म्वजुर तर होलिकारि मीन्नयेन् छ्वयेन् नोलु जुर, इथि शत्रुता दउ होलिका सिङन् प्रल्हाद म्वाकु खुशीकु आमु छ्वयेन् च्वंगु मीकु दउ मुपुर्सि लिकायेन् ब्वँकु डायेन् रसताये खँ उ पोँट मुकेय् अर्थकु खोइँदमु ।

उ तु ल्याखान् ल्यासिमिसा होलिकाय् घमण्डय् कारण्नतु पृथ्वीलोकय् मिपिसिन् आमु मिसामि राक्षसनी सिरिदोंगु होलिका त बामलकु खँन् बोलबियेन् हलेन् बजार थिगुरि उये जुइमल हँगन् थुकेइमलेउरा । आले केसि खुन्हुरि प्रल्हाद त छ्वउ मीन् मथियेन् बाँलस्केतु मीय् ह्याकलान् पितयये ल्याखान् रसतायेन् रंग ह्वालेन् अँबीर दलेङन् खुशी ब्वठयेन् म्येथय् खँ थुइमलेउ ।

उ च्वय् खँ त ग्वाहार बियेन्दिउ दाजु भगवानदास श्रेष्ठ त येक्कु येक्कु सुभाय्