जिरी, नेपालय् मुल पर्यटकिय गन्तव्य मध्य थिगुर खेउ । द्वाल्खा जिल्लाय् पर्यटकिय नगरी जिरी देश दुपान, पिपान आम्लीतु नामजायन चोन । नेपालय् स्विजरल्याण्डय् नामलान् नामजाउ जिरी प्राकृतिक सुन्दरतान् थिखाउ थिगुर बाँलकु गन्तव्य खेउ ।

मटरय् लो चलई जुई सोयन् हाखेन सगरमाथा हिमालय् दुत स्वाकटाय मुललुँखाय् नामलान् नामजाउ जिरी देश दुपानाय् हो पिपानाय पाउँनापिस्त मन त्यात्केउ ठाँई मध्य थिगुर खेउ । प्रकृतिन् विय डाँडा, पाखा वा थउ ठाँईकुत चोन वय नाप नापङ जिरेल जाती सुत्ता थि थि जातजाती हो भाषाभाषीपेन चोङन ययन दियन चोङन दिरहिन् । आन्थितु थउतु भिन्न संस्कृती आले परम्परा दमु । 

जिरी, जिरेल जातय् लुँउ ठाई खेउ । उकु जिरेल नाप नापङ शेर्पा, तामाङ, सुनुवार, नेवार, क्षेत्री हो बाम्हण सुत्ता थि थि जातजातीय् बसोबास दमु ।

ईथितु लिकंन बजार, पुरान हाटडाँडा, खावा डाँडा जिरी बजारय् मुल ठाँई आले बजार खेउ । जिरीकु सुविधा सम्पन्न होटेल, लजपेन बाँलकु व्यवस्था दमु । उकु यउ पर्यटकपिसिन् चौरी साय् दुधुलान् बनई जुउ याक चिज, छुर्पी आले जिरीकु उत्पादन जुउ किवी, चिया हो आलु त कोसेलीय् रुपकु यनहिन् ।
यचउ जिरी, ओगउ जिरी (क्लिन जिरी, ग्रीन जिरी) अर्गानिक जिरी, जिरीय् मुल नारा खेउ । उकुय् व्यवसायीपिसिन् जिरी यउ पाउँनापिस्त अर्गानिक परिकार नकेरहिन् । ईथितु जिरीकु दउ तेन्जिङ हिलारी पार्क, टोनी हेगन पार्क, स्टोन पार्क, मानेडाँडा पार्क, बुद्ध पार्क हो गुँरास पार्ककु रमई जुई फरहिन् ।

जिरी नगरपालीका वडा ल्याखाः १ कु दउ ङागुरपुखुर (पाँचपोखरी), जटापुखर, धार्मीक हो पर्यटकिय केन्द्र खेउ । स्वर्गय् थिगुर टुक्रा मानेङ ऊ ठाँईकु क्वाल्ती पुनिस खुन्हु ड्वाकु जात्रा ङाकेरहिन् । हनुमानन् सञ्जीवनी पुटी यङ धार्मीक विश्वास दउ हनुमन्ते, जिलेश्वर महादेव, हलेश्वर महादेव, रामबोले कालिदेवी, जिरी गुम्वा, यलुुङ गुम्वा सुत्ता देउ देगल हो गुम्वा चैत्य, आले चर्चपेन उकुय् मुल गन्तव्य खेउ ।

जिरीकु दके चोङ दक्षिण एसियाय्तु टाहागउ गुरु रिम्पोछेय् देउ (मुर्ति) बौद्ध धर्म मानेकुपिस्त मेवु आकर्षणय् केन्द्र जुयन् चोन । जिरी यउ पर्यटकपेन पुटीचागाउ पदयात्रा हो हाईकिङ ओनहिन् । ङागुर पुखुर (पाँचपोखरी), जटापुखुर यात्रा जिरीलान् क्याङ्से पुखुर जुयन च्योर्दोङ टुल्लेय् यात्रा गुराँस पार्कलान् ड्वाकु नागी जुयन् हनुमन्ते टुल्लेय् पदयात्रा प्रकृतिय् बाँलकु सुन्दरतानाप रमई जुई फरगु ।

च्योर्दोङ जिरीय् सुन्दर नामजाउ पाखा खेउ । आकुलान् खोईदउ गौरीशंकर हिमाल, नुम्बुर हिमाल, रोल्वालिङ्ग हिमश्रृङ्खला बयान यरी लायकय् दमु । शिक्षा, पशुपालन हो कृषि अध्ययन भ्रमणय् लागिनुङ जिरी थिगुर गन्तव्यय् रुपकु कारहन् ि। आन्थितु नेपालय् नपना जिरी प्राविधीक शिक्षालयय्, नेपालय थिगुर जुकुन सा आनुवंशिक स्रोत केन्द्र जिरीकु तु दमु ।

आन्थितु यचउ सलसल थउतु सुरकु बगई जुउ जिरी खो, लिङ्कन बजारय् दक्षिणखेन्न खोईदउ उन्नत जातीय लस्कर लिङायन चोङ्गु सापेन, उन यत्ङ जिरीय् सुन्दरता थपेङन वियन तरै । उ खँ जिरीवासीय् लागिन् मेवु खुसी चाईमल्गु खँ दमु ।