भारत देशकु म्ये हलिकु नाम जाउ मिसा मयजु येक्कु हे बाँलकु व येल्पनु ङेङन् च्वइँ येउ सरय् धनी ब्रम्हाण्ड दोंखुसेनुं ओँसिय् म्ये हल्गु मुल नकिन मयजु लता मंगेशकर थन्हु् उ धर्तीलान् विदा कायेन गुल्पन लिपुलेन् मायाइरि ल्याखान् सर्गकु बास काये ब्वय्खँ तार्न आमु मयजुय् म्ये ङेङ्गु दोखसे मिखालान् ख्वबि पितयेर । मयजु लता मंगेशकर न न्हिङाता भाषालान् ङैदोल म्ये हलेन्तये दमु । मयजु लतान् हले गुं गुं म्ये ङेन्नसिन् ख्वबि माहाकेउ शायद ओल्तेचा मिपेन् दयेउ जेउ । मयजु लताय् थउतु जीवनकु मल्गु सहारा हङ तु उ म्ये व बाजाय् धुन जुकुन् खेउँ । लता याकर्चा तु च्वङन् च्वंगु खँ सिदत ।

मयजु लता मंगेशकरय् २८ सेप्टेम्बर १९२९ कु भारत देशय् इन्दैर मध्यप्रदेशकु जन्म जुउ खेउँ । लताय् बाय् नाम दीनानाथ मंगेशकर खेउँ । बोबु दीनानाथउङ् मञ्चकु ज्येखँकु म्ये हलेन् लिङाउ मि खेउँ । बोबु दीनानाथ न लता नक्क ङाद दर्नन्नसि म्ये हलित लय् चिँत स्येङन् यये खेउँ । लिबि जुर्न जुर्न लताये केहेँपेन् आशा भोशले, उषा मंगेशकर व मीना मंगेशकर नं थउ बोबु नाप तु म्ये हलि स्येङ खेउँ । मयजु लतान् ब्वङ कुठीकु आखर ब्वन्न आमे साङत अमान अलि खाँन साबिह व अमानत खान दउजु, उप्सिनुं कवाली म्ये हलेन् तये दमु ।

लता मंगेशकर त म्ये हलेन् तु जुनी काटेत् हङन् तु बाँलकु व साक्कु सर् बियेन् तये लागिन् जेउ, म्येय् नाप नापं बाँलकु व भिंगु खँ ल्हाइतं लिखन म्वओंगु जु । लताय् पेम्हा तिताकेहेँ तु म्ये हलिउरि मुलोँकु लिङार्सं मीना व उषान् दात्तिकु जाउदिये खँ ताइदत ।

लता मंगेशकर, आशा भोशले व उषा मंगेशकरन वा नेपाली भाषाकुं म्ये हले तयेदमु । लतान् गुलि म्ये गिथि हल्जु हङ खँ वा म्ये ङेङन्च्वंगुपिसिन् सिहेसिरै । ङाद दउ मुचाब्यालाकु तु प्याखन्कु ब्व कायेन् दोखुसे मन त्यात्के काइफउ मिसामुचा लता लिबि हर्स प्याखन् स्वयेनुं म्ये हलिकुतु लिङाइृ रसताये खँङ् सिदत । लता झिम्सोँद दर्न बोबु दीनानाथ मन्त । उकुलान्लि भातिचा लताय् जीवनकु जिम्मेवारी टोन्द येर । हात्तहर्स सोम्हा केहेँपिस्त स्वइमल्दन । आन्थिनुं हरेस मनयेन् थउ लक्षकु लिङाइ त्वार्मत च्वङन् उ ब्रम्हाण्डकु थिम्हा बाँलकु म्ये हलिसउ प्रतिभावान् मयजु लता मंगेशकर हङन् ओँसिकेइ फयेन् च्वन ।

तर आनागु बाँलस्के म्ये हलिसउफउ मयजु थन्हु दोखुसेत त्वार्त ओन्नसिन् नुगर हियेइरि अस्वभाविक मखे । इसिखेन्नलान् आमु मदउ आत्मान् टाहागौ ब्यालाटुल्के शान्ति नापथलत हङन् बिचार तये दमु ।